Poetry

Ek aadmi ki khwahish

Ek aadmi ki khwahish thi.
Zindagi yaadgaar bitaayi jaaye.
Chahe mar jaaye vo khud kisi din.
Duniya mein amar ho jaaye.

Sochi usne tarkeeb, banaaya plan
Jo tha sabse pare, sabse niraala.
Log the hairan ki ye tha mumkin.
Jaisa raasta usne tha nikaala.

Yaad kiya jaunga main duniya mein.
Agar ban jaunga ek taanashah.
Aur gar na ban saka main vo.
Kar dunga ek poora desh tabaah.

Shuruaat thi dheemi.
Har kadam lagta tha bhaari.
Pehle usne apna ghar jalaya.
Phir thi raajya ki baari.

Desh ka number bhi aaya.
Aur ki usne shuruaat karaamati.
Demonetization ka bomb giraya.
Apne desh pe ki gola-baari.

Par raasta tha lamba.
Aur gati pad rahi thi dheemi.
Itne se desh kahan tabah hota.
Ek aadmi ki aakhir kitni taakat hoti.

Kismat ka chahiye tha saath usko.
Ya phir ek nayi kism ki rajneeti.
Usne apna kaam shiddat se kiya.
Aur bhagwaan ne bhi thoda saath diya.

Waqt ki lakeer mein aaya ek bhanwar.
Duniya ko mili ek nayi mahamaari.
Darr ka bana maahaul par.
Sabne ki isse ladne ki tayyaari.

Har desh jab lad raha tha isse.
Yahi hai mera mauka, usne socha.
Jab waqt tha sach aur himmat ka.
Usne desh ke galat raaste moda.

Banaayi baatein usne aisi ki.
Logon ne dekhe khwaab kamaal.
Kiye logon ne faaltu kaam.
Taaliyaan bajin, baje thaal.

Waqt laga, saal gaya.
Rakha usne dhairya.
Aakhir jala poora desh.
Apne bhi ban gaye gair.

Darr, beemaari aur maut.
Ab yahi har taraf aalam tha.
Kuchh logon ko lagne laga.
Kya yahi uska maksad tha.

Usne dekha apne aas-paas.
Ek tha waqt jab jala tha raajya.
Garv se chouda hua uska seena.
Aaj jal raha hai saara raashtra.